DESALOXO NO PARQUE OFIMATICO

Escribo estas liñas co fin de compartir unhas reflexións con respecto á operación urbanizadora do parque ofimático, de actualidade por mor da execución o luns mesmo do seu primeiro despexo, un proceso complexo de evolución inxusta que é fiel reflexo das miserias no desenvolvemento urbano, especialmente no caso da Coruña. Un proceso con múltiples responsables, comezando polos técnicos, ideólogos dunha operación baseada na consecución de plusvalía, que podían ter considerado a inserción das vivendas existentes na zona, na ordenación proposta, en troques de facer tábula rasa a costa de todo.

Un proceso executado na cresta da onda da burbulla inmobiliaria, que finalmente colisionou coa realidade. Responsable tamén é unha administración avalista da proposta técnica, defensora exclusivamente duns intereses mercantís, que despois de meses de indiferencia pide agora diálogo e comprensión ás persoas afectadas cando o que realmente espera delas é sumisión, unha administración municipal que cofunde os dereitos sociais coa caridade.

E tamén unha clase empresarial especuladora, apoiada por parte da sociedade, persoas egoístas que apoian un modelo inxusto e depredador, que trata a vivenda como ben de mercadoe non como dereito. Aínda quedan nos terrenos do parque ofimático outras 13 familias, das que cinco reclaman a desafección das súas vivendas, e o resto un realoxo gratuíto, non piden imposibles, só precisan vontade política, non caridade senón xustiza.
Xiao Varela Gómez / A Coruña
Publicado en : La Opinión